يقين الخير

سلام يا أهلنا في طابت سلام عاشق ضناهو الشوق

مسافر ديمه بالآها ت و بالكلما ت مدى الاوقا ت بسوى القوق

زمانى الطال مفارق لى ديار الخير وراحة البال ولى أهلى البهزموا العوق

صقور الجو شموس الضو نحاسم دو وخيرم وافى ماممحوق

حليل أهلى الحنان بالحيل جمال الشيل بجبرو الحيل رجال الذوق

ديار الغربة مابترحم وحاتكم مالقيت غيركم إزيل الهم وبيهو الدنيا تصفى تروق

سلام يا أبوى يالجيلى الرفيع قدرو وسطيع بدرو وفى صدرو مداين وسوق

سلام يا أبوى يالطيِّب وريث أب رسوه يا أب قلباً حنين طيِّب و يالهيِّب مكانك فوق

**********

سلام يا عشه يا يمه سلام وسلام عليك يا بهجة الايام ويامطر الخريـف والرى

سلام يا أسما يا نسمه ويا أملى العليك عشت سنين و سنين

وياغاية مناى الزين و يازينة بنات الحى

متين تجمعنا دى الايام و تطفى للهيب الحى

(أقدلى وسكتى الخشامه و أنزلى فى العوازل كى )

سلام أنوسه يا سهيمونه يا ليمونه و الأخوان سلام يا مى

ولى أعمامى و العما ت ولى أخوالى و الخالات و للجنيا ت

وللولد الطبق عددو و دفق مددو نجيض بطران وماهو النى

سلام لى طابت المحمود مسيد الجود ولى أهلى البخلفو الكى

وللخلوا ت وللنوبا ت وللحلقا ت وللسادات رجال الطى

سلام يايمه يالحاجه حليل الحاجه يا يابا يقين الخير مليحة الزى

حليل مهيوبه لما تدور تضوى الدور و تجبر خاطرى المكسور تزيل البى

حليل حبوبه لما تقول تخدرو ما تعدرو يا وليداتى ودقر ِجد لى

أبقو الشمعه قشو الدمعه أدنِ قريب تعال آجنى

تعال بى جاى سريع يانعيمه جيبى الشاى

والمهيوبه جيبى قباشه ليهو جناى وأشرب زيد وكِمّلا ماتفضل شى

ومكه بنوها لى فالا وحالى مقالا مافى مثالا فرقتا جد صعيبه على

**********

وحاتك ما نسيت عهدك و لا زمنى القبيل الفا ت وبيك طابت أماسينا

وقت نقعد حداك يايمه ننسى الهم وننسى الغم حنانك هو البنسينا

ونمدح فيك حبوبه ولى نعم العنا وبوبا ونسافر فى بحور الشوق وفيك كانت مراسينا

فراقك يمه مابنطاق على الاطلاق وبعدك مين يزيل الضيم يواسينا

حنانك لينا كان دفَّاى و كان هنَّاى و فيك غناى ومين بعدك سديدة الراى إصابحنا و إماسينا

**********

وغيرك مين يسر العين يقش الدمعه للمسكين وضيـف الليل

ومين يا يمه للضيفان وللقيمان و للعطشان يحاكى النيل

وللمحزون وللمغبون وللمغموم وللمهموم يشيل الشيل

مثيلك يمه مالقيناهو ماشفناهو فى معناهو يا ست الزمان والجيل

حليل حبوبه دخرى الحوبه ساعة النوبه والمهيوبه والتهليل

حليلك يمه للاخوان وللحبان وللعشمان حليل زمنك حليل وحليل

وطاب معناك والفردوس تكون مثواك ورحمة ربى يوت تغشاك

سلامى عليك مع التبجيل وشوقى إليك كثير بالحيل

وشوقى إليك كثير بالحيل………