بين البخيت وحجاج :
حجاج :
يوم الأحـد حــدي الحمــارو مسـدد
ولا بهجس ولا جاري الحـداي لي برقُـد
ده الخلاني أهواك وفوق سهمك دوام مُتردد
البخيت :
يـوم الإثنين هـاج بي الغرام وشفانــي
هـاج بي الغـرام وسوطو فوقي قلانـي
جلـدك قرمصـيص يا خليقة الرُمانــي
يجمـع بي لمـاك السـيد السمـانــي
حجاج:
يوم الثلاثـاء انطبقن علـي هميــن
وبي هم البريـدو والدراهـم ويــن
ود الأريـــل أبـــو خـديــن
يجمع بي لماك جد الحسن وحُسيــن
البخيت:
يوم الأربعاء أســباب هلاكي وموتــي
ده العينة الجابوها ناس كرجوس مع البنوتي
ده السبب الخـلا دوام النمة باقية مقوتــي
حجاج :
يوم الخميس خُمـسين علي بزيــادة
والروح اتركت والجُثة قعدت عــادة
نارك ما تموت يالكهرباء الوقـــادة
غير المـوت قط أنا ما بفك ملهاجـا
البخيت:
تلفون الغرام الليلة أصبح جـــاري
رسم سكة الحديد صنفورا يوقد نـاري
السـماعة قلبي والمحطـة أفكــاري
قطر الحُب مولِع والعُشُق كمسـاري
حجاج :
وين مُهــر الجــزائـر الشـاتـن
وين مُهرات كانو الفوق الصـرايا بتاتن
وين الكرفهن يحيي العـروق الماتــن
دوب ليهن الشـاتن عقـولنا وفاتــن
البخيت :
وين أم لوناً يضوي زي رتاين السـوق
وين النـار تتـني كُلُ ليـلة تســوق
منك ما بتوب أنا إن بلعوني حبــوب
وريدك ما بروح لي جرة الواســوق
حجاج :
وين تفــاح الضناقــلـة البلــح
أضحكي خلي قلب العاشِق الإجــرح
غرامك غارني راكب ملبسات ومُسلح
الخرب الخربتي إخربو ما بتصلــح
البخيت :
وين يا الباقـر الزول المتمـم ريـدو
وين العاشِق الفِد يوم ما استلم قميـدو
وين البكتُل النجفة ويضـوي خديـدو
حدو خشم الباب الما بتراه العيــن
واشتهوا الجيران وليهن منو سنيـن
أبوساري