دهـــاليز

ما كنت قايل الشوق

بصل مد البصر

وفي لحظة تتهدم دهاليز الكلام

وتطلع حروف مشكولة بالضمات تفتش لي طريق شايل السلام

مجنونة تتعلق في طرف كل التشوفو وتسألو عن أولاد الحمام

وعن غيوم برّاقا قبلي خجلانة تسقي قبل مايجيها الضلام

بس ما لقت مرسال إشيل من بروق أشواقا حبة لي عيون كل الكرام

و إتكسّرت فيها الحروف وإتشتتت كل النقط ونامت الكلمات حطام

وأفتح خيال في الزمن وادخل أبواب السنين وارجّع في الحنين أيام

لمّا زينوبة إتوسدت في يوما أحضان التراب

ما انفتح لي بيتا باب

ولا الجنا الخاتنّو دخري لملم الأيام وجاب

والأمس كان ضيّو جاهر إندفن بي نورو غاب

والمسينيح المعربد جاتو صحية وساب وتاب

ولمّا آخر شعاع في الغروب يلمس حيوط ود أب سن الورا

تطلع شمس جوة الغروب

وتشتل شعاع في القلوب

والجليد الفي الشعور يبكي ويدوب

وتنحت فيوض الموية أشكال الدروب

وتسقي الجنا الفي طوابير البلد مصلوب ..