دابْـوانا

 

كُـتَّ بشرح إلاّ بسكت              

بس عشان خاطري وعشانا

وبرضو بشرح مش عشان خاطري وعشانا

بس عشان خاطر القلوب الدابو إتفجر حنانا

القلوب النازفة من جرح الهوى البشبه هوانا

وكل واحد يسقي من دمو وحنانو سيسبانة

ولمَّـا تكبر وتبقى في عِـز عنفوانا ..

تندثر والصـد يفرهِـد في مكانا

= = =  =

جيت أبِـل شوقي المِحرحِف من حنانا

جيت أهدهد لوعة المشتاق ومتصبِّر عشانا

ما بفكر إلاّ فيها ، وما سليت سحر البطانة

يا الحنان السال ، وما ريَّـق ظَـمانا

ياالبِريقْ اللاّح وسط ظلمة عِـشانا

جيتِـك إنتِ ، وجيت عشانك يافُلانه

= = = =

أهِي ديك ست ريدي جات زي البشارة

في عيونا الناعسة بلمح ألفِ شارة

وهيَ تخفي لهفَ شَوقٍ قدْ توارى

خلفَ حُزنٍ قدْ تبدى في جسارة

آهِ ثمَّ آهِ ثم بل أواهُ .. ما سِـرَّ العبارة

أين يامحبوبتي سلوايَ هاتيك النضارة

= = = =

كنتَ بفرح لمَـا يجمعنا التلاقي

لمَـا تتشابك قلوبنا الهايمة في لحظة عناقِ

ما لو بِتْـفَلَّـتْ عبيرك حتى من قبل التساقي

كنتِ بتراعي المودة وكنتِ بتعزي إشتياقي

الغريبة الليلة شوفتك ، أشعلت نار الفراقِ

ما ظلمتك لمَّـا شفتِكْ إلاّ بس الباقي باقي

= = = =

ما حَكَتْ ، إلاّ القِليب حسّ بظنونـا

لمّـا جاتْ تختال على أنغام لُحونا

مالا جاتْ ، ما زي زمانْ ،بي كل شجونا

ساسقتْ في عيني دمعة ، قلتَ اصونا

وتلَّبتْ في خاطري حسرة ، حِلتَ دُونا

يا قلب لملم جراحك وعيش بدونا

= = = = =

في سماي كنتِ البتضوي براكِ زي قمر العَشِـيَّة

وديمة بترقب طلوعك يا المِتِل شمس الضُـحَـيَّة

كنتَ بفرح بيك واترجاكِ زي سنةً رخِـيَّـة

وينا نظراتا البتشفي ،، وينا بسماتا الندية ؟؟

علموكِ الغدرِ أصلاً ما حصل فرطتِ فِـيَّ

وانتهت قصة غرامنا الحلوة يا أجمل هديَّـة